心裡有鬼｜薛可正
我叫張阿民，1960年出世，開平人。
我住喺大埔吐露港邊一間小屋，今年60歲，如果唔死嘅話。
無錯，我係一隻鬼，農歷七月上水同大家講吓故事，平時我無咁活躍，不過七月份就湊個熱鬧現一現身，鬼同人一樣，都需要儀式感。
我暫時未知道自己幾時可以投胎，陰間投胎同你哋排公屋一樣，條龍好長架。加上因為我係排「有錢人」嗰條龍，你哋陽間呢一年經濟愈嚟愈仆街，愈嚟愈少有錢人，搞到我都唔知等到幾時，先可以投胎。
我知，你哋實會問，我係點死，
我係炸死嘅。
二十年前周記士多單案，個老闆自己包二奶都仲要打老婆，差佬嚟到嗰時仲要扮放煤氣自殺，我啱啱行過，見到呢啲仆街男人梗係要睇吓佢俾人拉嗰個樣，點知差佬未疏散得切啲人，就有條開緊工嘅傻仔無啦啦點煙，我就係咁，因為八卦嘅正義感死咗。
嗰年，我先得39歲。
人死咗之後，真係好悶。呢間爛屋，就係當年周記士多嘅地點，因為我係枉死，所以我一直都離唔開呢頭附近，行到咁上下遠就好似有個禁區牌，叫我停步，返轉頭。
呢度出名鬧鬼，其實係因為我八卦，成日有啲行山嘅人經過，我都會唔小心行得太近。你哋唔好誤會，我無現身，只不過我呢啲陰人行得太近，陽間嘅人就會覺得凍，佢哋就話呢度好猛鬼。
其實我一直都好迷思，我無現身但又俾佢哋發現咗，咁呢單嘢個罪魁禍首算唔算係我自己？
不過都好嘅，因為呢個原因，多咗好多人嚟探靈，我就學精咗，唔敢行咁埋，廢事佢哋覺得凍。點解我好似好怕俾人知道我存在咁，你哋陽間都有「擾亂安寧」呢條罪架，下面啲牛頭馬面打人嗰時仲過份呀，吓吓拎狼牙棒向住我塊面係咁打，打到成身都係窿都麻煩架。
每次有啲電視台嚟，我都特別開心，見到佢哋啲表演就覺得好笑。明明得我一隻鬼，又話周圍都係；秋天翻風，又話啲靈體宜家好嬲，啲風愈來愈大喇，我邊有嬲，我都唔知睇得幾開心。
招靈又話見到度門郁，度門燒到紙咁薄，秋風起就實會吹得郁啦，我真係要現身搞你我使乜搞度門呀？
佢哋招魂係最好笑，點支蠟燭，坐喺屋入面乜都唔講，我唔理佢哋，因為次次坐得十分鐘佢哋就會自己大叫，唔係頭好暈，就係聽到好多人講嘢，邊度有鬼同你講嘢，我都唔識你可以同你講咩？
就係因為咁，搞到好多細路仔都嚟探靈，有時一日幾團，仲旺過土瓜灣啲玉石舖。
有啲唔知死，嚟度又屙尿又周圍噴油，我唔敢出嚟嚇佢呀犯法架嘛，佢哋臨走前又話咩鬼呀咁無料到，我仆你個街我幾時話我自己好勁呀？
你哋嚟打擾我，又假設我強大，搞亂我啲地方，臨走都仲要串我，點解要將你哋嘅期望硬放我身上，最後又覺得對我好失望？
終於有一次，一個十幾歲嘅細路，嚟度我呢度搞亂不特止，仲講啲好難聽嘅說話：
「我睇報紙講，你係八卦先會俾人炸死，因為八卦而死，你都真係好抵死呀，哈哈哈哈。」
我望住佢講呢句說話，你條友宜家咪又係一樣因為八卦，而且仲要咁無禮貌，我忍唔住去佢耳邊好細聲講咗句：
「係呀，嘻嘻。」
佢就暈咗，最後聽講送咗入深切治療，醫咗成個月先無因為心臟病發發死佢咋。邊個話俾我知？咪係判刑嗰時牛頭同我講囉，宜家知我點解有排都唔可以投胎啦。
其實做人唔好咁八卦，真係少好多煩惱，個世界都靜好多。
有一次有對情侶，因為壞車所以喺吐露港停咗架車埋一二邊，傾吓傾吓就嘈起上嚟，原來係個女仔話想結婚，再唔結婚又會俾屋企班三姑六婆多事，話佢咁耐都唔嫁。
計我話你使咩理呢啲硬要將自己希望放喺其他人身上嘅人，呢個世界就係未結婚嘅人想結咗婚嘅人婚姻完美；而結咗婚嘅人就想未結婚嘅快啲結婚，如果唔係，就係有問題，大家浪費大家嘅期望。
其實最麻煩，就係呢啲人，明明有啲事唔關自己事，為咗加入，就咬牙切齒咁話對人好失望，其實一家唔知一家事，你做乜春嘢無啦啦要對人咁有期望？
八卦就八卦仆你個街，好啦天光喇，下次再傾。
____________________________________________________________
薛可正TBC文章收費平台《榕樹頭唔斷氣》現已推出
隨意門：https://pr7d8.app.goo.gl/GSAM
每周定時更新文章，
九月推出全新連載故事，
文字有價，多多支持。
文章列表：
1.「我的成長地」〈免費〉
2.「置樂」 〈收費〉
3.「1991年9月1」 〈收費〉
4.「隆重冷氣儀式」〈收費〉
5.「三聖神石」 〈收費〉
6.「發發」 〈免費〉
查詢網址：tbcstory.com
*******************************************************
IG：sithoching
Page：薛可正
Search